АҞӘА, нанҳәа 25 – Sputnik. Белоруссиатәи абизнесуаа Аԥсны иазҿлымҳауп ҳәа аҳәамҭа ҟаиҵеит Аԥсны ахада Аслан Бжьаниа урыстәылатәи ажурналист Владимир Соловиов аинтервиу анииҭоз.
"Аҵыхәтәантәи аамҭазы Белоруссиатәи абизнесуаа Аԥсны аинтерес роуит. Уажәы аиҿцәажәарақәа мҩаԥысуеит – абизнесуаа Аԥсны иҟоуп", - иҳәеит ахада.
Бжьаниа иажәақәа рыла, белоруссиа-аԥсуа ганқәа еицырзеиԥшу апроект азырхиахоит.
"Белоруссиа-аԥснытәи еицырзеиԥшу аекономикатә апроект аусура иалагоит. Сгәы иаанагоит, уи аиныррақәа еиҳагьы иарҭбаап ҳәа, ҳаззымдыруагьы ҳаднардырып ҳәа" - иҳәеит Аԥсны ахада.
Уаанӡа аинтервиу аҿы Бжьаниа иҳәеит Аԥсны шазыхио Урыстәылеи Белоруссиеи рҳәынҭқарратә Еидгыла алахәра.