АҞӘА, нанҳәа 25 – Sputnik. Шьамтәылатәи Арабтә республика Адәныҟатәи аусқәеи аҳәаанырцә инхо аџьынџьуаа рызҵаарақәеи рминистр Феисал Микдади Аԥсны адәныҟаполитикатә усбарҭа ахада Инал Арӡынбеи нанҳәа 25 азы ашәҭшьыҵәрақәа шьҭарҵеит Аҟәа, Ахьӡ-аԥша абаҟа амҵан.
Анаҩс Шьамтәылатәи аделегациа Алада Ешыраҟа, Аԥсны раԥхьатәи ахада Владислав Арӡынба имемориал ахь инеины дыргәаларшәеит.
Шьамтәылатәи Арабтә республика Адәныҟатәи аусқәеи аҳәаанырцә инхо аџьынџьуаа рызҵаарақәеи рминистр Феисал Микдад официалла Аԥсны даҭааит нанҳәа 24 ауха. Аԥсуа-аурыс ҳәааҿы асасцәа дырԥылеит Аԥсны адәныҟаполитикатә усбарҭа ахада Инал Арӡынба. Раԥхьаӡа акәны Шьамтәылантәи Аԥсны даҭааит зыҩаӡара ҳараку аҳәынҭқарратә усзуҩ.
Арӡынбеи Микдади Аҟәа рнапы аҵарҩраны иҟоуп Аԥсни Шьамтәылеи рыбжьара аполитикатә еиҿцәажәарақәа рзы Амеморандум. Атәыла аминистр иажәақәа рыла, ашәҟәы анапы аҵаҩра Иааигәоу Мрагылара ахырхарҭахь аусура аизырҳара иазырхоуп.
Шьамтәыла Аԥсны ахьыԥшымра азханаҵеит 2018 шықәса лаҵарамза 29 азы. Аҟәеи Дамаски адипломатиатә еизыҟазаашьақәа рыбжьоуп.