АҞӘА, цәыббра 4 – Sputnik. Аурок аҟны ахәыҷқәа ателефонқәа анрымоу акыр ирԥырхагоуп, абри атәы арадио Sputnik иазеиҭалҳәеит Аҟәатәи ахԥатәи ашкол аиҵбыратә классқәа рҵараҟәша аиҳабы Татиана Инаԥшьԥҳа.
"Ахәыҷқәа гәыла-ԥсыла ателефон иадҳәалоуп. Арҵаҩы атема ҿыц еиҭеиҳәоит, ахәыҷқәа ртелефонқәа ирҭоуп, аурок абжа аинтернет иҭоу ыҟоуп. Арҵаҩы агаджет имихыр, иҽирҭынчуеит. Ус акәымкәа иџьыба иҭеиҵазар, иҭел ахь ауп ихы ахьыҟало", - еиҭалҳәеит лара.
Аҟәатәи ашкол №3 аҿы аҵаҩцәа аурок алагамҭаз ртелефонқәа хаз иарбо аҭыԥ аҿы иқәырҵоит. Агаджетқәа анрымам ахәыҷқәа арҵаҩы илзыӡырыҩуеит, аурок атемагьы бзианы еилыркаауеит, лҳәеит Инаԥшьԥҳа.
"Ателефонқәа рыбжьы дырцәоит, ахәыҷқәа аӡәы аҭел дасуазаргьы ишьҭырхыр аауӡом. Арҵаҩцәа ҭынч аурокқәа мҩаԥыргоит. Ус ҳәарада ателефонқәа зегьы ирымоуп, рҭаацәеи дареи еимадоуп", - азгәалҭеит лара.
Урыстәыла аҵара аминистрра аԥшьгамҭа- аурокқәа рҿы аҭелқәа рхархәара аанкылара дахцәажәо аԥсихолог Анжела Ладариаԥҳа илҳәеит, уи шиашоу.
"Ииашаҵәҟьаны асмартфонқәа рԥырхагоуп аурок анцо. Ҳәарада, уа иуԥшааша аинформациа рацәоуп, аха аурок аамҭазы акәым. Насгьы дара аиҳарак асоциалтә ҳақәа ирҭоуп. Ахәыҷқәеи аҭаацәеи реимадара ҳаԥырхагам, аха уи азы иазхоит "афонарик" ҳәа изышьҭо ателефонқәа", - лҳәеит лара.
Ладариаԥҳа илҳәеит арҵаҩцәа аурок алагамҭаз ателефонқәа ылырхлар, аурок анҵәамҭаз идырхынҳәлар шауа.
"Ахәыҷқәа анхәыҷу аԥкрақәа рыҭалатәуп. Рыла ишазеицәоугьы азгәаҭатәуп. Ахәыҷи уареи шәеицәажәалароуп, иуҭаху дазааугалароуп", - азгәалҭеит Ладариаԥҳа.
Урыстәыла акәзар, ари аҵарашықәс инаркны аурок анцо агаджетқәа рхархәара ҟалом. Аҵара аминистр Сергеи Кравцов иҳәеит, асеиԥш аӡбра зрыдыркылаз ателефонқәа аҵаратә процесс иахьаԥырхагоу азы шакәу.