АҞӘА, цәыббра 6– Sputnik, Бадраҟ Аҩӡба. Аԥсны аҵареи абызшәатә политикеи рминистрра адгыларала Аԥснытәи абитуриентцәа фҩык ироуит алшара IT-коллеџь "Сириус" аҿы аҵараҵараз, уи Афонд "Талант и успех" арҵаратә екосистема иахәҭакуп, абри атәы иҳәеит аминистрреи ауаажәларреи реимадараз аҟәша аиҳабы Аслан Қәҭелиа Sputnik аинтервиу аҭо.
"Ҩышықәсоуп ҳабитуриентцәа IT-коллеџь "Сириус" иҭалартә еиԥш аҭагылазаашьақәа рзаԥҵоижьҭеи. Аԥснытәи абитуриентцәа ироуит алшара IT-коллеџь "Сириус" аҿы аҵараҵара Аԥсны Аҵара аминистр Инал Габлиеи арҵаратә центр "Сириус" анапхгареи реицәажәара иабзоураны. Аколлеџь аҭалара адагьы дара ацентр имҩаԥнаго аолимпиадақәа, аицлабрақәа зегьы ирылахәхар ҟалоит", - иҳәеит иара.
Ҵыԥх IT-коллеџь "Сириус" иҭалеит быжьҩык Аԥснытәи аушьҭымҭацәа. Ацентр аҿы аԥсуа студентцәа хәыда-ԥсада аҵара рҵалоит.
"Ииасыз ашықәс азы 11 класс ирылгаз ракәын ирыдыркылоз. Сынтәа ажәбатәии ажәабатәии аклассқәа ирылгазгьы рыдыркылоит", - иҳәеит аминистрреи ауаажәларреи реимадараз аҟәша аиҳабы Аслан Қәҭелиа
Алкааратә етапқәа зегьы онлаин Аԥсны имҩаԥысуан.
IT-коллеџь "Сириус" иҭалеит: Владислав Аргәын (аинформациатә системақәеи апрограммаҟаҵареи), Ева Манукиан – (асасааирҭатә маҵзура), Арноу Џьапуа – (акомпиутертә системақәеи акомплексқәеи), Лорена Симонова - (аинформациатә системақәеи апрограммаҟаҵареи), Алекс Абдельнур - (аинформациатә шәарҭадара аиҿкаара), Александр Подпругин - (акомпиутертә системақәеи акомплексқәеи).
"Аҵараиурҭа ҵыԥх иҭалаз ишырҳәо ала агәахәара ду рымоуп ара аҵара ахьырҵо. Атеориа адагьы Иандекс, Роснефть, Ростелеком еиуеиԥшым рпроектқәа ирылахәуп. Ҳгәаанагарала ари ҵаҵӷәы бзиоуп IT аусхк адырыҩцәа рааӡараҿы", - иҳәеит иара.
Аҵара мҩаԥысуеит ԥшьышықәса рыҩныҵҟа латәаратә ҟазшьала. Астудентцәа азеиԥшнхарҭаҿ ауадақәа рырҭоит иҳәеит Қәҭелиа.