АҞӘА, цәыббра 7 - Sputnik. Аԥсны ахада Аслан Бжьаниа Ҟарачы-Черқьесиа ахада Рашид Темрезови ажәлар зегьи ареспублика ашьаҭаркра 100 шықәса ахыҵра рыдиныҳәалеит ҳәа аанацҳауеит ахада ипресс-маҵзура.
"Ҳара шәреспубликахь ҳааит ҳашьцәа аабоит ҳәа. Ҳара жәларык ҳауп. Абри аиԥш аныҳәамш аҽны шәааигәара аҟазаара ҳара ҳзы иҳаҭыруп", - иҳәеит Бжьаниа.
Рашид Темрезов иазгәеиҭеит аиашьаратә еизыҟазаашьақәа рырӷәӷәара аҵак ду шамоу.
"Сара сзы инасыԥуп ҳреспублика ашьаҭаркра амш азы шәахьаҳҭааз. Ари ҳаҭырқәҵара дууп ҳашьцәа аԥсуаа рҟынтә. Иҭабуп иахьа шәахьҳавагылоу", - иҳәеит иара.
Бжьаниа ареспублика ахада ҭабуп ҳәа иеиҳәеит ииҭаз ааԥхьаразы, иазгәеиҭеит ареспублика аҿиара амҩа ишықәу, Темрезов икоманда ишалдыршаз амилаҭбжьаратә ҭынчра аиҿкаара.
Ахадацәа аусеицура актуалтә зҵаарақәа ирылацәажәеит.
Аслан Бжьаниа цәыббра 6 -12 рзы усутә ныҟәарыла дырҭаауеит ҳаиашьаратә республикақәа хԥа: Ҟарачы-Черқьесиа, Ҟабарда-Балкариа, Адыгеиа.