АҞӘА, цәыббра 8 - Sputnik. Аицлабра "Аԥсны агәадура -2022" хыркәшан цәыббра 8 рзы.
Афиналистцәа жәаҩык- Баграт Ломиа, Алина Шамԥҳа, Валери Џьынџьал, Руслана Гергедаа, Лев Буава, Лиана Векуаԥҳа, Салима Ӡиӡариаԥҳа, Анна Голанӡиаԥҳа, Милана Шариаԥҳа, Анри Начҟьебиа, Инал Инапҳа аихшьаалатә комиссиа рҿаԥхьа рыпроектқәа ӡырыргеит, темақәас ишьҭырхит: аԥсуа бызшәа аиқәырхара, аҳәынҭқарратә усбарҭақәа рцифракра, иуадаҩу аҭаацәаратә ҭагылазаашьа змоу ахәыҷқәа рзы аамҭалатәи акризистә центр аԥҵара, аҿартә политика аҿиаразы аконцепциа.
Акомиссиа иалахәуп- Аԥсны Ахәыҷы изинқәа рыхьчаразы азинмчра змоу Мактина Џьынџьалԥҳа, Ареспублика Зҽаԥсазтәыз акультура аусзуҩ, асахьаҭыхыҩ Нугзар Логәуа, уаанӡатәи аԥыза-министр ихаҭыԥуаҩ Александр Страничкин, уаанӡатәи аԥыза-министр, адәныҟаполитикатә усбарҭа уаанӡатәи ахада Сократ Џьынџьал.
Аконкурс иаиааиз хҩык алкаахоит аетапқәа зегьы рҟны ироуз ахәшьарақәа реицҵарала. Алҵшәақәа рылаҳәахоит цәыббра 9 рзы.
"Аԥсны агәадура" - анапхгараҭаҿы аус зур зылшо аҿар реицлаброуп, уи хықәкыс иамоуп Аԥсны Аҳәынҭқарраҿы абаҩхатәра злоу аҿар раарԥшреи рыдгылареи. Аиҿкааҩцәа ргәы излаҭаркыз ала, ари аицлабра анапхгаҩцәа ҿарацәа рзы социалтә цхыраагӡахоит, шьаҭасгьы иазыҟалоит ламыс злоу, зус здыруа абиԥара ҿа рыбзоурала аҳәынҭқарратә аппарат арҿыцра.
Ҳтәылаҟны раԥхьаӡа аицлабра "Аԥсны агәадура" мҩаԥган 2020 шықәсазы. Усҟан аицлабра алахәхаразы 150 рзаҳал нашьҭын. Иалкаан хәҩык. Урҭ анаҩс Урыстәыла рҟазара ацҵареи рԥышәа аизырҳареи рзы алшара рыҭахоит. Иара убасгьы ԥхьаҟазы аусурҭа ҭыԥқәа роура алыршахоит.
Аицлабра есышықәса амҩаԥгара шазыԥхьагәаҭазгьы 2021 шықәсазы акоронавирус иахҟьаны имҩаԥгамызт.