АҞӘА, цәыббра 10 - Sputnik. Аҷыдалкаатәи азинмчы змоуи Аԥсны ацҳаражәҳәаҩ Инар Ладариа даҭааит Никарагуа Амилаҭтә Ассамблеиа, уа иареи адепутатцәеи ареспубликаҿы аҭагылазаашьа иалацәажәеит, абри атәы аанацҳаит Аԥсны ААР Амедиацентр.
Адырраҭараҿы иазгәаҭоуп Ладариа никарагуатәи адепутатцәа ишырзеиҭеиҳәаз Аԥсны аҭоурыхи ҳажәлар ахьыԥшымразы рықәԥара амҩа атәи.
Адепутатцәа еиҭарҳәеит Амилаҭтә Ассамблеиа аусура атәы, агәыӷрагьы аадырԥшит аԥсуа парламент аҿы ишаԥҵахо Никарагуеи Аԥсни реиҩызара иазку адепутаттә гәыԥ, уи аҩреспубликак рпарламентқәа реимадарақәа рырӷәӷәара иацхраауеит рҳәеит дара. Никарагуа Амилаҭтә Ассамблеиаҿы Аԥсны аҩызаратә парламенттә гәыԥ аԥырҵахьеит.
Ацҳаражәҳәаҩ ари алагала дадгылеит, агәыӷрагьы ааирԥшит аԥснытәии никарагуатәии адепутатцәа русеицура шхацыркхо хара имгакәа.