АҞӘА, цәыббра 16 - Sputnik. Аԥсны аҿар ртеатр асезон ҿыц аԥсуа лакәқәа ирылху ахәыҷтәы спектакль "Реиҳа мчы змада?" ала иаатит ҳәа арадио Sputnik иазеиҭеиҳәеит Аԥсны аҿар ртеатр адиректор Аслан Еныкь.
Асценари авторс дамоуп Есма Ҭодуаԥҳа. Лара лзы ари раԥхьатәи ԥышәароуп. Аспектакль режиссиор-қәыргылаҩыс дамоуп Ирма Гәылуаԥҳа. Ари аҩбатәи спектакльуп лара лзы.
"Атеатртә сезон абри ақәыргыламҭа ала иааҳартырц ҳаӡбеит, избанзар ахәыҷқәа ирызку аԥсуа спектакльқәа акыр имаҷуп. Асеиԥш асценари ахьҳауз акыр агәахәара ацуп. Сгәыӷуеит ԥхьаҟагьы Есма Ҭодуаԥҳа аус лыцааулап ҳәа", - иҳәеит Еныкь.
Аспектакль аԥхьарбара Аԥсуа ҳәынҭқарратә театр асценаҿ идырбахоит цәыббра 15-16 асааҭ 16:00 рзы.