АҞӘА, цәыббра 18 - Sputnik. 35 нызқьҩык аҳәаанырцәтә тәылауаа равтотранспорт аԥгаԥса азыруит Аԥсны лаҵара 17 инаркны цәыббра 1 аҟынӡа, абри аҩыза астатистика ааигеит аилазаара "Гарант-страхование" аиҳабы ихаҭыԥуаҩ Ахра Қьецба арадио Sputnik аефир аҿы.
Аҳәаанырцәтә автомашьынақәа еиҳарак арахь иаауеит аԥхынразы. Цәыббрамза иалагазар, Қьецба иажәақәа рыла, зхатә автомашьынала иаауа аԥсшьаҩцәа рхыԥхьаӡара иагхеит.
Аилазаара "Гарант-страхование" аиҳабы ихаҭыԥуаҩ иааигаз арбагақәа усҟак ибзиам ҳәа рхиҳәааит, арҭ амзақәа рзы ареспубликахь иааз аԥсшьаҩцәа рзеиԥш хыԥхьаӡара ҳасаб азуны.
"Иаҳԥырхагоу аҭагылазаашьақәа ыҟоуп. Актәи - аинформациа инагӡаны иҳауам. Аҩбатәи - уаанӡатәи Асовет Еидгыла аҵакыраҿы иҟоуп агәаанагара - "сара амашәыр сақәшәаӡом, акгьы ҟасҵаӡом" ҳәа. Иара убас аӡәырҩы ргәы иаанагоит усгьы аӡәгьы аԥара сиҭаӡом ҳәа", - азгәеиҭеит Қьецба.
Иахьатәи аамҭазы амҩатә машәыр иақәшәаз ирзыршәо аԥара 50 нызқь рҟынӡа иҟоуп. Қьецба игәаанагарала, аԥгаԥсатә хараԥсақәеи аԥарашәарақәа ршәагааи ԥсахтәуп, избанзар урҭ уажәшьҭа иажәит, ирзыршәо аԥара автомашьына арҽеира иазхом.