АҞӘА, цәыббра 21 - Sputnik. Виетнам абанк BIDV-и Ҟазахстан абанк "Халык-и" рҿы аԥарахсаалага "МИР" амаҵ аура ааныркылеит ЕАА Афинансқәа рминистрра асанкциақәа рыдҟаҵалараз ианрықәмақар ашьҭахь, абри атәы рҳәеит Урыстәыла ААР аҭагылазаашьа-кризистә Центр адепартамент аҿы.
"Халык банк" (Ҟазахстан) BIDV-банк (Виетнам) аԥарахсаалага "МИР" амаҵ аура ааныркылеит ЕАА Афинансқәа рминистрра асанкциақәа рыдҟаҵалараз ианрықәмақар ашьҭахь", - аҳәоит аусбарҭа Telegram-канал аҿы.
Цәыббра 15 азы америкатәи афинанстә усбарҭаҿ икьыԥхьын адокумент, уи инақәыршәаны иҳәан ЕАА шазыхио урыстәылатәи аԥарашәаратә система аԥарахсаалагақәа "Мир" Урыстәыла анҭыҵ зхы иазырхәо абанкқәа асанкциақәа рыдҟаҵалара.
Урыстәылатәи аԥарашәаратә система аус ауеит: Урыстәыла, Аԥсны, Аахыҵ Уаԥстәыла, Ҭырқәтәыла, Виетнам, Аладатәи Кореиа, Ермантәыла, Белоруссиа, Ҟазахстан, Киргизиа, Таџьикистан, Узбекистан.
Аԥсны амилаҭтә ԥарашәаратә система "АԤРА" асистема "Мир" иалархәуп. "Мир" ахьрыдыркыло атәылақәа зегьы рҿа аԥснытәи ахсаалагақәа аус руеит.