АҞӘА, цәыббра 24 - Sputnik. Аԥсны акультура аминистр Даур Ақаҩбеи уи иабжьгаҩ Артур Лакрбеи злоу аԥснытәи аделегациа алахәуп Грозныи ақалақь аҿы имҩаԥысуа Алада Урыстәыла ажәларқәа ркультуреи рыспорти XII рфестиваль аусура. Абри атәы аанацҳауеит Акультура аминистрра апресс-маҵзура.
Афестиваль аҳәаақәа ирҭагӡаны имҩаԥысуа аицлабрақәа ирылахәуп аԥсуа спортсменцәа. Аицлабрақәа рыбжьара иҟоуп армрестлинг, ашьапылампыл маҷ, ашаха ахара, атлетика лас, ахыци ахәымпали рыла ахысра, ашахматқәа.
Иара убас афестиваль аан еиҿкаахоит акультура-рккаратәи аҭҵаарадырра-практикатәи усмҩаԥгатәқәа, уа ирылацәажәоит еиуеиԥшым актуалтә зҵаарақәа, иаҳҳәап, аконцерт-гастрольтә усура, амилаҭтә профессионалтә коллективқәа русура, амилаҭтә коллективқәа акультуратә еимадарақәа ирызку апроектқәа рылахәхара уҳәа ирызку.
Сынтәа афестиваль иалахәуп 600-ҩык рҟынӡа ауаа Урыстәыла 14 регион рҟынтәи.