АҞӘА, жьҭаара 2 - Sputnik. Еврокомиссиа ицәырнагеит иара иалахәылоу атәылақәа рзы абжьгара ҿыцқәа, урҭ инарықәыршәаны урыстәылаа авизақәа рыҭараан ашәарҭадара агәаҭареи аҳәаахьчаратә гәаҭареи рӷәӷәахоит.
Евроеидгыла абжьгара ҟанаҵоит аамҭакьаҿлатәи авизақәа рыҭарагьы дырџьбарарц. Урҭ рҩызцәа рыҭараан аҳәынҭқаррақәа хҭысцыԥхьаӡа ҷыдала иҭырҵаалароуп, агуманитартә шьаҭа ыҟоу иҟаму.
Иазгәаҭоуп авизақәа Урыстәыла анҭыҵ иҟоу урыстәылаа ирырымҭалар шакәу. Уе еиԥш иҟоу арзаҳалқәа Урыстәылатәи Афедерациахь рынхарҭа ҭыԥ аҿы иҟоу аконсулрахь ирышьҭларц рабжьгоуп
Евроеидгыла аҵакырахь шенгентәи авизақәа рыла иалало урыстәылаа 90 мшы еиҳаны уа изаангылом.
Убри аан, урыстәылаа шенгентәи авиза рымазаргьы, Евроеидгылахь алалара ԥкрада ирылшоит ҳәагьы иаанагом.
"Авизатә кодекс ахәҭаҷ 30 инақәыршәаны авиза амазаара иаанагом Шенгентәи азонахь ԥкрада алалара ҟалоит ҳәа. Авиза аԥыхразы/архынҳәразы ашьаҭа аныҟоу, ус еиԥш аӡбамҭа аднакылар алшоит аҳәаахьчаратә маҵзура, уи авиза изҭаз атәыла-алахәыла арбану иахьмырԥшкәа", - ҳәа аанацҳауеит Еврокомиссиа.
Аекспертцәа иазгәарҭоит абжьгара ҿыцқәа рымшала урыстәылаа рдокументқәа, авизақәагьы убрахь иналаҵаны, еиҳа инҭырҳәцааны ишгәарҭало, Европаҟа ицо ареисқәа ианрықәтәо, иара убас Евроеидгыла атәылақәа ианрылало аҳәаахьчаратә гәаҭара ахысраан.