АҞӘА, жьҭаара 15 - Sputnik. Аԥсны акультура аминистр Даур Ақаҩбеи Урыстәылатәи ашәҟәытә еидгыла ахада ихаҭыԥуаҩ Леонид Пулькои аусеицуразы аиқәшаҳаҭра рнапы аҵарҩит.
"Ҳусеицура еиҳа инарҭбаау алшара ҳнаҭоит Урыстәыла иҭрыжьуа ашәҟәқәа зегьы ҳтәылахь раагаразы", - иҳәеит Ақаҩба.
Урыстәылатәи ашәҟәытә еидгыла ахада, ауаажәларратәи аполитикатәи усзуҩ Сергеи Степашин иажәақәа рыла, Урыстәылатәи ашәҟәытә еидгыла аҳәаанырцәтәи ахаҭарнакра раԥхьаӡа акәны Аԥсны ишаарту.
"Аԥсны аурыс бызшәа рхамшҭӡацт, аурыс шәҟәқәа гәыгәҭажьым, араҟа урысшәала иаԥхьоит ицәажәоит", - иҳәеит иара.
Степашин иҳәеит Урыстәылатәи ашәҟәытә еидгыла ахьӡала Аԥсуа милаҭтә библиотека 2000 шәҟәы шаҭахо. Уи иабзоураны ахәыҷтәы шәҟәқәеи, аҭҵарадырратә усумҭақәеи, ароманқәеи, иахьатәи алитературеи рыла абиблиотека афонд харҭәаахоит.
Урыстәылатәи ашәҟәытә еидгыла аԥҵан 2001 шықәсазы. Иара иалоуп ашәҟәытә аусхк знапы алаку 1500 субиект.