АҞӘА, жьҭаара 19 - Sputnik. Аԥсны аганахь ала Евроеидгыла имҩаԥнаго аполитика иаанаго аԥсуа жәлар рҭахкаареи рықәымчреи роуп, абри атәы иҳәеит Аԥсны адәныҟатәи аусқәа рминистр Инал Арӡынба.
"Евроеидгыла Аԥсни Урыстәылеи реиҩызара агәаԥхом, урҭ ишрылшо ала ари аҭагылазаашьа аиҭакра рҽазыршәоит. Уи, ҳәарада, изалыршахом", - иҳәеит аминистр.
Аԥсны ААР ахада иҳәеит 80% жәларбжьаратәи аиҿкаарақәеи НПОқәеи Аԥсны инарыгӡо апрограммақәеи апроектқәеи Евроеидгыла иофициалуи иофициалыми аусбарҭақәа аԥара шырзоурыжьуа.
"Ганкахьала дара агуманитартә проектқәа мҩаԥыргоит, аҽа ганкахьала Аԥсны аҵакыраҿы аус зуа атәылауаҩшәҟәқәа азхарҵом. Ари, ҳәарада, ҩ-стандарттә политикоуп", - иҳәеит Арӡынба.
Арӡынба иажәақәа рыла арҭ агуманитартә проектқәеи апрограммақәеи Аԥсны аҩнуҵҟатә политикеи ауааԥсыра рыхдырреи ирныруеит.
Аԥсны ирыҭоу урыстәылатәи атәылауаҩшәҟәқәа мап рыцәкразы ЕЕ рыӡбамҭа ҳтәылаҿы аус зуа жәларбжьаратәи аиҿкаарақәа рпрограммақәеи рпроектқәеи рынагӡараҿы анырра анаҭар алшоит ҳәа азгәеиҭеит Арӡынба.