АҞӘА, жьҭаара 19 – Sputnik, Асмаҭ Ҵәыџьԥҳа. Аԥсны Жәлар Реизара ашәахтә усхк аҿы азакәанԥҵара аус адызулаша аусутә гәыԥ аԥнаҵеит.
Агәыԥ иалоуп адепутатцәа, ахада иусбарҭа, Аминистрцәа реилазаара, Агәаҭаратә палата, Ахәаахәҭра-ааглыхратә палата русзуҩцәа, иара убас аҵарауаа-аекономистцәа.
Агәыԥ ахантәаҩыс даиуит абиуџьети, акредиттә еиҿкаарақәеи, ашәахтәқәеи, афинансқәеи рзы Апарламент аилак ахантәаҩы ихаҭыԥуаҩ Дмитри Маршьан.
Маршьан иажәақәа рыла, аусутә гәыԥ хықәкыс иамоуп Гәылрыԥшь, Тҟәарчал, Гал, Очамчыра араионқәа рҿы ашәахтәқәа ԥсшьараамҭа арежим алагаларазы азакәан аԥҵара, мрагыларатәи Аԥсны анаплакытә усура арҿиаразы аҭагылазаашьа маншәалақәа раԥҵара, мрагыларатәии мраҭашәаратәии ахәҭақәа ҵакыра реицәыхарара армаҷра.
Иара иазгәеиҭеит ари аҩыза азакәан апроект иақәшаҳаҭхар, "зыӡбахә ҳәоу араионқәа ирықәырҵо ашәахтәқәа зыԥҵәак ала иҟалоит - уи ноль акәхоит, Аԥсныҟа атауарқәа ралагалараан иақәырҵо ашәахтә аламҵакәа". Маршьан ишиҳәаә ала, ашәахтә ԥсшьараамҭа иақәшәоит ҿыц иҭарҩыз анаплакқәа заҵәык, урҭ рсиа адокумент ианылоит.
"Азакәан апроект хықәкыс иамоуп анаплакцәа арҭ араионқәа рхарьџ аларҵарц азы агәаҳәара рызцәыргара", - иҳәеит адепутат.