АҞӘА, жьҭаара 20 – Sputnik. Аԥсны АҶА ахада Лев Кәыҵниа аԥыза-министр Александр Анқәаб изеиҭеиҳәеит аусбарҭа жәымзтәи аусура атәы. Абри атәы аанацҳауеит Аминистрцәа реилазаара апресс-маҵзура.
2022 шықәсазы аӡаҿы иҭахеит 12-ҩык: хҩык Аԥсны ауааԥсыреи жәҩык Урыстәыла ауааԥсыреи. Аҳасабырбатә аамҭазы АҶА аусзуҩцәа 38 ԥшаара мҩаԥыргеит, 29-ҩык еиқәдырхеит, хәҩык иҭахаз рыԥсыбаҩ рыԥшааит.
Лев Кәыҵниа иҳәеит жәымз рыҩнуҵҟа 808 мцакра шыҟалаз, хәҩык шҭахаз. 303 мцакра адәнытә мцакрақәа иреиуан. Ажьырныҳәа аахыс аусбарҭа аусзуҩцәа 1 200 ргылара гәаҭан ирхысит.
Иарбоу аамҭа иалагӡаны ихацыркын 224 административтә ус, ахараԥсақәа идыртәеит 1,4 миллион мааҭ. Иара убасгьы АҶА ахада еиҭеиҳәеит Донбасс ауааԥсыра рзы агуманитартә акциақәа рымҩаԥгара атәы. Ажәахә аихшьалақәа ҟаҵо, аԥыза-министр иҳәеит аусбарҭа аусура ахәшьара ҳарак шеиҭо, ԥхьаҟазы еиуеиԥшым абжьгарақәа ҟаиҵеит.