АҞӘА, жьҭаара 25 - Sputnik. Аԥсны Абанк агәаларшәагатә ԥараҿырп ҿыцқәа ҭнажьит – "Кавказ ажәларқәа рцәамаҭәеи рабџьари" ахкы аҟынтә: "Ачерқьеси" "Ачерқьесҭыԥҳаи". Абри атәы аҳәоит Абанк асаит.
Аԥара 925 ҩаӡара иҟоу араӡныцқьа иалхуп. Аметалл цқьа 150 грамм иҟоуп. Аԥараҿырпқәа рформагьы уаанӡатәиқәа иреиԥшым – икәакьҭаиашоуп, 42 х 70 иҟоуп.
Аԥараҿырп ареверс иануп асахьаҭыхыҩ Баҭал Џьапуа иусумҭа – ачерқьес еибашьҩи ачерқьесҭыԥҳаи рсахьақәа, иҷыдоу, аԥшшәы змоу аметод ала аметалл ианҵоуп. Аверс аҿы иануп Д. И. Ермаков XIX ашәышықәсазы иҭихыз афотосахьа "Аԥсуа депутатцәа" аҟынтәи аԥсуа еибашьцәа рсахьа.
Аԥараҿырп ахәԥсацәҟьа 20 аԥсар иҟоуп. 100 -100 цыра ҭыжьхоит.