АҞӘА, жьҭаара 25 – Sputnik. Ҭагалан-аӡынтәи аамҭа аенергетикцәа рзы зегь раасҭа иуадаҩуп ҳәа "Гал ТВ" иазеиҭеиҳәеит АУН "Амшынеиқәафымцамч" Гал араион афилиал анапхгаҩы Ниаз Џьгеренаиа.
"Ус шакәугьы аҽазыҟаҵарақәа ҳарҿуп. Аҟәантәи иаагоуп атрансформаторқәа, ахәша, афымцатә цәаҳәақәа амашәыртә усурақәа рымҩаԥгаразы. Араион аҿы ацәаҳәақәа акыр иххаауп", - ҳәа иҳәеит иара.
Аҟазауаҩ иазгәеиҭеит, аӡынраз аамҭа-аамҭала алашара арцәара аҭахымхар ҟалоит ЕгрыГЕС агенерациа уадаҩра амоур.
"ЕгрыГЕС агенерациа ауадаҩрақәа амоур, ҳаззымиааиша уадаҩра ҟалом. Иҟоуп ҭаҵәахқәак, уи адагьы "Амшынеиқәафымцамч" анапхгара аԥхынразы изызхәыцыз рацәоуп аӡын ҳазыхиазарц. Иааганы ишьҭоуп ашьаҟақәа, ацәаҳәақәа, ахәша", - ҳәа иҳәеит Џьгеренаиа.
Убри аан иара иҳәеит ииасыз аамҭақәа ирҿырԥшны акриптавалиута амаининг ауадаҩрақәа шхҽыз. Уи афымцацәаҳәақәа реидара маҷхоит.
"Галтәи араион еснагь арбагақәа бзиоуп, аԥареизгаралагь иалукаартә иҟоуп", - ҳәа иҳәеит иара.
Аҵыхәтәантәи аҩымз рыҩнуҵҟа Гал араион аҿы 18 трансформатор арҽеирақәа рзыруит, афымцатә цәаҳәақәа хәҭа-хәҭала ирыԥсахит иҳәеит иара.
Ааигәа иҟаз амшцәгьақәа раан аҵлақәа жәпаџьара икаҳаит. Урҭ афымцацәаҳәақәа ахьԥырыҵәҵәаз ыҟоуп, ашьаҟақәа каҳаит, атрансформаторқәагьы аахақәа роуит. Џьгеренаиа иазгәеиҭеит абасеиԥш аан аенергетикцәа хымш рыла аԥсабаратә рыцҳара ахҟьаԥҟьа аҭыԥ ишықәырҵыз.