АҞӘА, жьҭаара 31 - Sputnik. Москва Абиблиотека №36 аҿы иаадыртит Фазиль Искандер Имемориалтә кабинет. Абри атәы аанацҳауеит Москватәи аԥсуа диаспора рсаит.
Аҭааҩцәа рыблала ирбар рылшоит ашәҟәыҩҩы дызхатәаз астол, дызлакьыԥхьуаз амашьынка, 300 рҟынӡа ашәҟәқәа зҵазкуа ибиблиотека ахәҭак.
Жьҭаара 22 рзы, акабинет аартра амш аҽны арахь иааит москватәи алитературатә уаажәларра, Москватәи аԥсуа диаспора рхаҭарнакцәа, Искандер иҭаацәа, ирҿиамҭақәа бзиа избо.
Арҿиаратә хәылԥаз аҟны Искандер иажәабжьқәа ирыԥхьон, ирҿиамҭақәа ирылацәажәон, дыргәаладыршәон. Уи адагьы аӡыргара аҳәаақәа ирҭагӡаны Франциа иҭыхыз Елена Сурина лфильм "Амшын" аԥхьарбара мҩаԥган, уи ашәҟәыҩҩы заатәи иажәабжьқәа руак шьаҭас иаиуит.