АҞӘА, абҵара 1 – Sputnik, Бадраҟ Аҩӡба. Аҟәатәи амшын аԥшаҳәаҿы иқәыргылоуп Архип Лабахәуа искульптура ҿыц – Корнеи Чуковски иперсонаж Бибигон хәыҷы.
"Ари аҷкәын хәыҷ "мальчик-с-пальчик" ҳәа изышьҭоу ахаҿсахьа деиԥшуп, амала Чуковски уи ахьӡ ииҭеит - Бибигон. Ҩба-хԥа шықәса раԥхьа ари аперсонаж сгәы дҭашәеит, иагьысҭаххеит искульптура ҟасҵарц, бзиа избо сықалақь ҳамҭас иасҭарц", - ҳәа еиҭеиҳәоит Архип Лабахәуа.
Апроект адгылара арҭеит аскульптор иҩызцәа хҩык. Дара аскульптура аҟаҵаразы иаҭахыз аԥара ирҭеит.
"Аскульптура 400 доллар иҳазтәеит. 100-100 доллар еилаҳԥсеит. Сыгәҭакы атәы анрасҳәа, даара гәахәарыла ирыдыркылеит. Аскульптура Шәача идырҭәеит. Аџьаз иалхуп. Аура 12 сантиметра иҟоуп. Сантиметрк ала еиҳауп Питер игылоу Резо Габриаӡе и-Чижик-пыжик аасҭа", - иҳәеит Лабахәуа.
Автор иажәақәа рыла, Бибигон – агәыӷра, агәрагара, агәаҳәара зныԥшуа афилософиатә темақәа рызхәыцразы ииллиустрациа бзиоуп.
"Аамҭак азы агәрахаҵара, агәыӷра, агәаҳәара рыда иахьатәи ҳаамҭа ауаа ԥсҭазаара рымамшәа збо салагеит. Аха арҭ аҭагылазаашьақәа аҵаҵӷәы рымазароуп. Ари аҷкәын хәыҷ згәышьрак дханагаланы аҵла ақәцә дықәтәаӡам, мамзаргьы иҽеиҵыхны аҭәа тата дылаиаӡам – уаҵәы абӷьыц снақәтәаны ӡык сынхылан, бнатә ргәыцқәак сыҟәшәандаз ҳәа дхәыцӡом. Иара иԥшәма– Чуковски ижәцәеимаа ицәӷьычны аӡы ахылара иҽазишәоит. Абаша гәыӷра аасҭа адырра дашьҭалеит, абаша гәаҳәара аасҭа уск ҟаиҵарц дашьҭалт", - иҳәоит иара.
Архип Зураб-иԥа Лабахәуа - асахьаҭыхыҩ, аскульптор, адизаинер. Аҟәа аԥшаҳәаҿы иқәгылоу Фазиль Искандер ифырхацәа Чики Никеи рыскульптурақәеи, "Апингвин – философи" , "Аҵани", "Ҭаҷкәыми адауи" дравторуп. Иара убасгьы Аԥсны Абанк аҿаԥхьа игылоу аӡыршә-маҷ инапкымҭоуп.