АҞӘА, абҵара 3 – Sputnik, Бадраҟ Аҩӡба. Аԥсны аҭҵаарадыррақәа Ракадемиеи Урыстәылатәи аҭҵаарадыррақәа Ракадемиа иатәу Петербургтәи аҭоурых аинститути аиқәшаҳаҭра рыбжьарҵеит абҵара 3 рзы.
Аиқәшаҳаҭра рнапы аҵарҩит Аԥсны аҭҵаарадыррақәа Ракадемиа ахада Зураб Џьапуеи УАР Петербургтәи аҭоурых аинститут адиректор Алексеи Сиренови.
"Анапы зҵаҩу Аиқәшаҳаҭра акраҵанакуеит, избанзар аԥсуа ҵарауаа– аҭоурыхдырыҩцәа, аетнографцәа, аиҳаракгьы аспирантцәеи аҵарауаа ҿарацәеи ирнаҭо рацәоуп", - ҳәа азгәеиҭеит Зураб Џьапуа.
Уи адагьы анапы зҵаҩу адокумент аԥсуа ҵарауаа ирнаҭоит алшара Санкт-петербургтәи аҭоурых аинститут аҿы адиссертациақәа рыхьчара. Алексеи Сиренов ҭабуп ҳәа ахиҳәааит иҭаз ааԥхьаразы.
"Ҳара ҳазгьы ари аҩыза адокумент анапаҵаҩра акраҵанакуеит, избанзар ҳаҭҵаарақәа рҳәаа арҭбаауеит, аусеицураз аԥеиԥшқәа ҳауеит. Ҳусеицура акраҵанакуеит иара убасгьы ҳаинститут ааигәа Зураб Џьота-иԥа аҳәаанырцәтәи алахәыла ҳәа дахьалнахыз. Ҳколлега иоуп", - иҳәеит иара.
Аԥсны аҭҵаарадыррақәа Ракадемиа ахада Зураб Џьапуеи УАР Петербургтәи аҭоурых аинститут адиректор Алексеи Сиренови агәалашәаратә ҳамҭақәа еимырдеит.
Аԥсны Аҭҵаарадыррақәа Ракадемиа аԥҵан 1997 шықәсазы.