АҞӘА, абҵара 4 - Sputnik. Ахәаша, абҵара 4 ашьыжь асааҭ 10 инаркны аҳауатә цәаҳәа "Аҽгәара" аҿы афымцаҳақәа реидара иацҵоуп ҳәа аанацҳауеит аԥыза-министр ихаҭыԥуаҩ, аекономика аминистр Кристина Озган лыпресс-маҵзура.
"Аенергетикцәа маҷ-маҷ аидара шьҭырхуеит, афымцамҩангагақәа рхымҩаԥгашьа иашьклаԥшуеит. Аԥышәаратә усура иаанарԥшит ацәаҳәақәа иахәҭоу ахьанҭара шышьҭырхуа", - ҳәа аҳәоит адырраҭараҿы.
Уажәы аусурақәа мҩаԥысуеит адгьылҭыԥ "Бедиа" аҿы, уаҟа аусура иалахәуп изыхәҭоу аусбарҭақәа зегьы.
Иазгәаҭоуп атәыла лашарала аиқәыршәара шымҩаԥысуа урыстәылатәи афымцамч ацхыраарада.
Уаанӡа "Амшынеиқәафымцамч" аҟны ирҳәахьан, арҽеиратә усурақәа жьҭаарамзаз излагаз иаалырҟьаны иаанкылан Урыстәылантәи иаарышьҭуаз афымцамч аҿҳәара аиаанӡа иахьаанкылаз азы ҳәа.
Убри инадҳәаланы жьҭаара 1 инаркны абҵара 1 аҟынӡа 32 километра ацынхәрас 24 километра роуп иԥсахыз. Абҵара 3 ауха аԥышәаратә усурала алашара аноурышьҭ (250 МВт), автоматика ацәаҳәа арцәеит. Уи ашьҭахь амчхара рмаҷны алашара еиҭоушьҭын.