Сариа Кәарцхьиаԥҳа, Sputnik
Аԥсуа драматә театр
Абҵара 10 асааҭ 19:00 рзы - "Сариа".
Ҟабардатәи адраматург Зарина Ҟаныҟәа лпиеса иалху аспектакль ықәлыргылеит Мадина Аргәынԥҳа. Аспектакль аҿы еиҭаҳәоуп Лавренти Бериа иҩнаҭаҿы Сариа лыԥшәма Нестор Лакоба ахәшә ихәы иалаҵаны ианирҭа ашьҭахь ллахьынҵа цәгьа. Сариа дырбаандаҩны дҭаркит. Уаҩ изхымгаша аџьамыӷәа цәгьа дҭадыргылеит, гәымбылџьбарала илызныҟәон. Лхаҵа ажәлар дышраӷоу азы лҿахәы лҿырхырц иашьҭан, аха лара урҭ ирҳәоз дацныҟәомызт. Иагьа мыҟәмабара лхылгазаргьы, Нестор дызламыз аус далан ҳәа далалымҟьашьит. Аҵыхәтәаны абахҭа дҭаршьит.
РУСДРАМ
Абҵара 11 асааҭ 19:00 рзы - аспектакль "Бродский". Амоноспектакль Иосиф Бродски ипоема "Шествие" шьаҭас иамоуп. Ароль хада налыгӡоит Милана Ломиаԥҳа. Абҵара 12 асааҭ 19:00 рзы - "Зынасыԥ зеижьаз Енџьы-Ҳаным". Аԥсуа шәҟәыҩҩы Даур Занҭариа иповест иалху амоноспектакль аҿы ароль хада налыгӡоит Анна Гиурегиан. Абҵара 13 асааҭ 15:00 рзы - ахәыҷтәы спектакль "Алакәтәыла Оз аҟынтә ахынҳәра". Арежиссиор-ақәыргылаҩ - Џьамбул Жорданиа.
Аԥсуа ҳәынҭқарратә Аҿар ртеатр
Абҵара 7 асааҭ 18:30 азы иҟалоит аспектакль "Аԥсҭазаара ахаҿсахьа". Атеатр актиорцәа аԥсуа шәҟәыҩҩцәа рсатиратә рҿиамҭақәа ирылхны аскетчқәа ҳдырбоит.