АҞӘА, абҵара 8- Sputnik. Аԥсны Адәныҟатәи аусқәа рминистр Инал Арӡынба Москва иҟоу Иран ацҳаражәҳәарҭа даҭааит, абри атәы аанацҳауеит ААР Амедиацентр.
Адәныҟаполитикатә усбарҭа аиҳабы дрыдышшылеит жьҭаара 26 рзы Шираз ақалақь аҟны атерракт иахҟьаны аҭычуааԥсыра рҭахаразы. Усҟан Шах-Черах амовзалеи аҟны иҟалаз ахысрақәа ирыхҟьаны 15-ҩык ҭахеит 40-ҩык ахәрақәа роуит.
Иара убас Арӡынба Аԥсны ахада Аслан Бжьаниа ихьӡала Иран иқәынхо ажәлар дрыдышшылеит, агәалсратә шәҟәы аҟны анҵамҭа аанижьит.
Адәныҟаполитикатә усбарҭа аиҳабы иажәақәа рыла, Аԥсны зҿлымҳара дулла Иран иазыҟоуп, иацклаԥшуеит Иран, Ҭырқәтәыла, Урыстәыла, Нхыҵ Кавказ ареспубликақәа еидызкыло 3+3 аформат аусушьа.
Уи аԥхьа имҩаԥысит Инал Арӡынба Урыстәыла иҟоу Аахыҵ Уаԥстәылатәи иколлега Ахсар Џьиоев иареи реиԥылара. Ирылацәажәеит аҳәынҭқаррабжьаратә еинырраз хра злоу азҵаарақәеи, Женеватәи аиҿцәажәарақәеи, Алада Кавказ аҭагылазаашьеи рызҵаатәқәа.