АҞӘА, абҵара 9 - Sputnik. Аԥсны Иреиҳаӡоу аусӡбарҭа ԥшьҩык амилициа аусзуҩцәа Алиас Гәниа, Альберт Хутов, Роман Ҟалӷьы, Денис Чаабалрхәа рҭакԥхықәрадараз ашьаус ахацыркра иашам ҳәа иаԥхьаӡеит. Абри атәы аанацҳауеит Апрокуратура хада апресс-маҵзура.
Цәыббрамзазы Аҟәатәи араионтә ӡбарҭа ахара зхараҵоу "апроцессуалтә ԥҟарақәа реилагареи ацәгьоуратә ҟазшьақәеи ыҟам" ҳәа ишьаны рышшыԥхьыӡ аднакылахьан.
Аҟәа араион апрокуратура аҭакԥхықәрадараз ашьаус хацнаркит ԥшьҩык амилициа аусзуҩцәа рганахь ала рашәарамзазы.
Аусбарҭа агәаанагарала, рашәара 4 ААИ агыларҭа "Учхоз" аҿы гәыԥҩык ауаа Урыстәыла атәылауаҩ Сонин С.А. даанкыланы амашьына дҭажьны дыргеит. Аҭыԥ ахь инеиз Аԥсны ААР аусзуҩцәа ацәгьоуцәа рмашьына иашьҭамлеит, рхымҩаԥгашьагьы зхьаԥшра арымҭеит.