АҞӘА, абҵара 16 – Sputnik. Польша, аиланхарҭа Пшеводув иахьаҵанакуа урыстәылатәи аракетақәа каҳаит ҳәа ирҳәо провокацианы иршьоит Атәылахьчара аминистрраҿы. Абри атәы аанацҳауеит аусбарҭа аофициалтә Telegram-канал аҿы.
"Абҵара 15 ауха Польша аиланхарҭа Пшеводув иахьаҵанакуа ирбаз аԥҽыхақәа рфотосахьақәа урыстәылатәи атәылахьчаратә комплекс аҟазауаа Украина арратә мчрақәа иртәу азенит-ракетатә комплекс С-300 иахәҭақәоуп ҳәа иршьеит", - аҳәоит адырраҭараҿы.
Аусбарҭа адыррала абҵара 15 азы Украина арра-напхгаратә системеи иара иадҳәало аенергетика аобиектқәеи ааха ӷәӷәа рыҭан. Иҭырҟьаз аракетақәа зегьы иззырхаз ацәҟьарақәа ирықәшәеит.
Иазгәаҭоуп ааха зҭаз Польша 35 километра иацәыхароу украинатәи аобиектқәа шракәу.
Убри аан иҳәоуп Киев аобиектқәа ааха шрыҭамыз, киевтәи арежим ицәырырго ауаа реиланхарҭатәи аилаԥыххаарақәа зыхҟьаз украинатәи аҳаирҿагыларатә мчқәа комплексқәа рзениттә ракетақәа ркаҳара шакәу.
Абҵара 15 азы Лиублинтәи аиланхарҭа Пшеводув аракета каҳаит. Иҭахеит ҩыџьа ауаа. Польша ахада Анџьеи Дуда иҳәамҭала макьаназ аракета ҭзырҟьаз иеилкаараз шьақәырӷәӷәагак ыҟам.