АҞӘА, абҵара 23– Sputnik. Бжьеихагылак иҟоу амедицинатә центр апансионат "Литфонд" аҵакыраҟны аргылара азгәаҭоуп, ахыбра "Концерн Росенергоатом" қьырала ирымоуп.
Апансионат аиҭашьақәыргылара иаҿуижьҭеи ҩышықәса ҵуеит.
"Уажәазы апроект аус адулара иаҿуп, бжьеихагылак иҟоу амедицинатә корпус аргылара азгәаҭоуп, уаҟа ҳусзуҩцәа рзы асанатор-курорт хәшәтәра иахыслоит", - иҳәеит аконцерн "Концерн Росенергоатом" адиректор хада ихаҭыԥуаҩ Џьумбер Тҟьебучаа.
Тҟьебучаа иажәақәа рыла, ацхыраара рыҭахоит Аԥсны атәылауаагьы.
Аԥсны агәабзиарахьчара аминистр Едуард Быҭәба иҳәеит, Пицундеи Гагреи еснагь ауаа рацәа зҭаауа қьалақьқәоуп ҳәа.
"Асезонбжьара аамҭазы ргәабзиара ашьақәыргыларазы ауаа ҳзаалозар, уи еиӷьу иҟоузеи", - иҳәеит аминистр.
Апансионат "Литфонд" Пицунда ақалақь агәҭа иацәыхарамкәа игылоуп, аӡиа Инкити, аԥсшьарҭатә ҵакыреи, аԥшаҳәеи рыбжьара. Ахыбра "Концерн Росенергоатом" қьырала ирымоуп, рашәарамзазы уи аҿҳәара иацҵан 2050 шықәсанӡа.