АҞӘА, абҵара 30 – Sputnik, Бадраҟ Аҩӡба. Аминистрцәа реилазаара абҵара 30 рызтәи аилатәараҟны Пицундатәи апансионат "Д. Гәлиа ихьӡ зху арҿиаратә ҩны" ("Литфонд") ақьыратә ҭагылазаашьа аԥсахит.
Аиҳабыра рыӡбамҭа инақәыршәаны, Аҳәынҭмазараз аилак ИАЕ "Ассоциация предприятий Минатом" аилаки рыбжьара аилаӡара аиҭакрақәа аланагалоит.
Аиҭакрақәа инарықәыршәаны қьырала игоу адгьылҭыԥ аҿы абаӷәаза маҷ, аплиажтә корпус, аспорттә зал рықәгара ҟалоит.
Иара убасгьы қьырала изгази, Акультура аминистрреи, Акапиталтә ргылара аусбарҭеи реиқәшаҳаҭрала иқәгоу аобиектқәа рҭыԥаҿ иргылахоит аплиажтә корпус, абаӷәаза маҷ, ахәышәтәырҭатә комплекс.