АҞӘА, абҵара 30 – Sputnik, Бадраҟ Аҩӡба. Аԥсны Аминистрцәа реилазаара ақәҵара аднакылеит Аԥсни Шьамтәылеи рыхәаахәҭратә хаҭарнакрақәа раартра аус азы Аԥсни Шьамтәылеи реиҳабырақәа рыбжьара аиқәшаҳаҭра анапаҵаҩразы.
Адокумент инақәыршәаны, аиҿцәажәарақәеи анапаҵаҩреи рымҩаԥгара ашьҭахь, Аԥсны Дамаск иаанартуеит Ахәаахәҭратә хаҭарнакра, Шьамтәылагьы Аҟәа иаанартраны иҟоуп Ахәаахәҭратә хаҭарнакра.
Ахаҭарнакрақәа атәылақәа рыбжьара ахәаахәҭра-економикатә еимадарақәа рнапынҵақәа нарыгӡалоит, ахәаахәҭреи егьырҭ аекономикатә усеицурақәеи рызҵаарақәа рзы рҳәынҭқаррақәа ринтересқәа ирықәныҟәалоит.
Уи адагьы, ахаҭарнакрақәа аинтерес зманы иҟоу аҳәынҭусбарҭақәа адырра рырҭалоит рҳәынҭқаррақәа рекономикатә ҭагылазаашьақәа рзи уа адәныҟаекономикатә усхк аҟны азакәанԥҵара аусушьази.
Иара убасгьы ахатәхаҿқәеи аиурист хаҿқәеи ацхыраара рырҭалоит ахәаахәҭартә еилаӡарақәа, аекономикатәии аҭҵаарадырра-техникатәии усеицура рҟны, ишиашоу аимадарақәа раԥҵараҿы, аицнаплакқәа раартраҿы.