АҞӘА, ԥхынҷкәын 12 – Sputnik, Бадри Есиава. Ԥхынҷкәын 11 рзы Афон Ҿыц имҩаԥысуаз зых иақәиҭу ақәԥараз ХХ жәларбжьаратәи аицлабра аспорттә клуб "Абаза" шьаҭаркуижьҭеит 10 шықәса аҵра иазкын ҳәа Sputnik иазеиҭеиҳәеит зых иақәиҭу ақәԥараз Аԥсны еизгоу акоманда азыҟаҵаҩ Игор Бераиа.
Иара иҳәеит аицлабрақәа ишрылахәыз 130-ҩык аспортсменцәа Аԥсны, Ҟабарда-Балкариа, Иваново, Москва, Калининград, Шәача рҟынтәи. Дара рыбжьара иҟан адунеии, Европеи, Урыстәылеи рчемпионцәеи аԥхьахә ҭыԥқәа згахьоуи.
Ироуз амедалқәа рхыԥхьаӡарала актәи аҭыԥ ныркылеит Гәдоуҭатәи аспортсменцәа, аҩбатәи – Аҟәа, ахԥатәи –калининградаа.
"Аицлабра ҩымш имҩаԥысуан. Зегь даара ибзиан. Агәырӷьара рацәа ацын. Ҳәарада аспорт аҿы ишыҟало аиԥш агәкаҳарагь ыҟан", - ҳәа иҳәеит Бераиа.
СССР аспорт азҟаза, аклуб "Абаза" ахада, Адунеизегьтәи аԥсуа-абаза конгресс ахантәаҩы Мусса Егзекь иаԥхьахә агаразы имҩаԥысуаз зых иақәиҭу ақәԥараз ХХ жәларбжьаратәи аицлабра аспорттә клуб "Абаза" шьаҭаркуижьҭеит 10 шықәса аҵра иазкын.