АҞӘА, ԥхынҷкәын 15 - Sputnik. Аҟәа Асахьаҭыхыҩцәа Реидгыла рцәыргақәҵатә зал хадаҟны иаатит Аԥсуа сахьаҭыхыҩ, асценограф, аҟазаҭҵааҩы Александр Шервашиӡе-Чачба диижьҭеи 155 шықәса аҵра иазку ацәыргақәҵа.
Уаҟа ицәыргоуп Александр Чачба иусумҭақәа 80 инареиҳаны. Иара убас, асахьаҭыхыҩ Александриатәии Мариитәии атеатрқәа рыҟны декораторс аус аниуаз иаԥиҵаз адекорациақәеи акостиумқәа рескизқәеи.
Урҭ рнаҩсгьы аҭааҩцәа ирбар рылшоит уи аамҭа иаҵанакуаз асахьаҭыхыҩцәа рпотретқәа - арежиссиор, адраматург Николаи Евреинов, актрисацәа Наталиа Бутковскаиа, Клодин Биссон уҳәа аӡәырҩы. Ацәыргақәҵаҿ ихадоу аҭыԥ аанакылеит асахьаҭыхыҩ Франциа амилаҭтә сахьаҭыхыҩцәа реилазаара дызхаларҵаз - автопортрет.
"Сынтәатәи ацәыргақәҵатә аамҭа хҳаркәшоит еицырдыруа асахьаҭыхыҩ Александр Шервашиӡе-Чачба игәалашәара иазку ацәыргақәҵала. Хәы-шықәса раԥхьа ҳара иазгәаҳҭеит 150 шықәса ихыҵра, аха ас еиԥш иҟоу асахьаҭыхыҩ иирамш есышықәса иазгәаҭалатәуп, избанзар уи ҳара иҳанаҭоит адунеитә культура алахәхара. Араҟа ицәыргоу аԥсуа коллекциоуп, аха иарбан усумҭазаалак ХХ ашәышықәсазтәи акыр зҵазкуа аҳҭысқәа рахь ҳхьадырԥшоит", - ҳәа лҳәеит Ацәыргақәҵатә зал хада аиҳабы Ельвира Арсалиаԥҳа.
Ацәыргақәҵа лхы алалырхәырц Санкт-Петербургнтәи дааит Александр Шервашиӡе-Чачба иԥҳа лмаҭа Татиана Заицева.
"Зегьы иҭабуп ҳәа шәасҳәоит Петербург сшыҟоугьы шәыԥхарра ахьсныруа. Ииашацәҟьаны, Александр Константин-иԥа ихьӡ Аԥсни Урыстәылеи, Аҟәеи Петербурги еиднаҳәалоит. Атеатртә музеи аҵәахырҭаҿ иҟоуп иескизқәеи иусумҭақәеи, Мариитәии Александриатәии амузеиқәа рыҟны, Достоевски имузеи аҟны ицәахуп иескизқәа. Зехьынџьара ианырҵоит дсахьаҭыхыҩын ҳәа, аха ҳара иаҳдыруазар ауп уи дышбаша сахьаҭыхҩымыз, иара атеатртә сахьаҭыхҩын", - ҳәа лҳәеит Заицева.
Алеқсандр Чачба - Аԥсны аҳ Қьалышьбеи Чачба имоҭа иԥа, раԥхьаӡатәи аԥсуа профессионалтә сахьаҭыхыҩ, Урыстәыла ареволиуциа ҟалаанӡа атеатрқәа рдекоратор ду, еицырдыруаз петербургтәи атеатрқәа асценограф.
Алеқсандр Чачба (Шервашиӡе) иусумҭақәа ҵәахуп Аҳәынҭқарратә милаҭтә сахьаҭыхратә галереиаҿы, аҳәынҭқарратә аурыстә театр аҿы, атеатралтә музеи аҿы, атеатралтә библиотекаҿы(Санкт-Петербург), Москва, Бахрушин ихьӡ зху атеатралтә музеи аҿы, Урыстәылеи, адунеи атәылақәеи жәпакы рҿы ахатәы коллекциақәа рҿы. Алеқсандр Чачба ихьӡ ахуп Аҟәатәи асаахьаҭыхратә ҵараиурҭа.