АҞӘА, ԥхынҷкәын 17 – Sputnik. Галтәи ахореографиатә ансамбль "Самырзаҟан" аԥхьахәтә ҭыԥқәа ааннакылеит Москвеи Санкт-Петербурги имҩаԥысуаз акәашаратә фестивальқәа рыҟны ҳәа аанацҳауеит Гал ақалақь аусбарҭа апресс-маҵзура.
Санкт-Петербург имҩаԥысуаз урыстәылазегьтәи афестиваль "Движение вверх" аҟны ансамбль Гран-при иаԥсахеит аԥсуа кәашаразы, ҩ-дипломк актәи аҩаӡара - албан кәашареи ашьхаруа кәашареи рзы.
Москва жәларбжьаратәи афестиваль "Диагональ" аҟны аԥснытәи акәашаҩцәа ҩ-дипломк роуит "Жәлар рхореографиа" азы, иара убас албанцәа рыкәашаразы Гран-при иаԥсахеит.
Ансамбль асахьаркыратә напхгаҩыс дыҟоуп Беслан Кобалиа, ахореографцәа - Паата Хубулава, Каха Цкәитариа, Зука Џьынџьолиа, Викториа Баркаиа.
Афестиваль "Движение вверх" мҩаԥысуан Санкт-петербур ԥхынҷкәын 9-11 рзы. Уи иалахәын аҟазаратә коллективқәа, ансамбльқәа, еиуеиԥшым ажанрқәа рсалистцәа.
Аицлабра "Диагональ" мҩаԥысуан Москва ԥхынҷкәын 11 рзы. Ахәыҷтәы коллективқәа еиндаҭлон еиуеиԥшым ахырхарҭақәа рыла - ахореографиа, амодеи атеатри, атеатртә ҟазара уҳәа.