АҞӘА, ԥхынҷкәын 17 - Sputnik. Аԥсны ауааԥсыра шә-тоннак амандарина еидыркылеит ДЖәР, ЛЖәР, Херсонтәии Запорожтәии аобластқәеи рыҟны инхо ахәыҷқәа рзы. Абри атәы аанацҳауеит аҳәынҭқарра ахада ипресс-маҵзура.
Аидара зго амашьынақәа Аҟәантәи амҩа иқәлеит ԥхынҷкәын 16-17 руыха. Иазгәаҭоуп амандарина раԥхьатәи ахәҭа Донбасс ишыҟало пхынҷкәын 19 рзы.
Агуманитартә еидара мҩаԥигоит Аԥсны АҶА аиҳабы Лев Кәыҵниа.
Аидара урыстәылаҟа агараҿы аԥсуа еиқәырхаҩцәа ацхыраара рырҭоит "Агвардиа ҿа" аволантиорцәа. Урҭ Урыстәыла арегион ҿыцқәа Донецк, Луганск, Херсонтәии Запорожтәии аобластқәа рыҟны ацентрқәа аадыртхьеит.
Донбасстәи ахәыҷқәа рзы амандарина аизгараз Аԥсны араионқәа зегь рыҟны аҭыԥқәа аартын ԥхынҷкәын 5 инаркны. Аԥсны ауааԥсыра алшара рыман ашықәсҿыцтәи аныҳәаз урыстәылатәи арегион ҿыцқәа иқәынхо рзы аҳамҭа аҟаҵара.