АҞӘА, ԥхынҷкәын 22 – Sputnik. "Амшынеиқәафымцамч" афымцамчҭира Аусбарҭа аиҳабы Алхас Ҷанба арадио Sputnik аинтервиу аҭо иҳәеит ареспублика ауааԥсыра атариф ҿыцқәа рыла алашара ахә шыршәо атәы.
"Иазгәаҭатәуп афымцалашараз аԥарашәара уадаҩны ишымҩаԥысуа, избанзар аԥаршәаратә леишәа еснагь иуадаҩын. Арахь иацлеит атариф ҿыцқәагьы. Аиҳаракгьы уаанӡа иҟази уажә иҟалази", - ҳәа иҳәоит Алхас Ҷанба.
Ахархәара зҭоу афымцалашара ахәԥса зшәои еизгоу аԥарақәеи атарифқәа шьҭырхаанӡа ишыҟаз иаанхеит ҳәа азгәеиҭеит иара.
"Ахатәхаҿқәа рыбжьара аԥареизгара уаанӡа ишыҟаз изахымсит уҳәар ауеит. Уажәы афымцамчҭаҩгақәа рықәыргылара мҩаԥысуеит, урҭ ҵыԥх аиҳабыра ари ахықәказы иазоурыжьыз 100 миллион мааҭ иҭагӡаны иаахәан. Аусурақәа цоит Аҟәа ақалақь аҩнуҵҟа. Ҳәарада ари алҵшәа аазышьҭуа усуп. Арҭ ахархәагақәа ахьықәҳаргылаз аҭыԥқәа рҿы аԥареизгара 90% инаӡоит", - иҳәеит Ҷанба.
Ахархәагақәа ахьықәгылоу аҭыԥқәа рҿы иара убасгьы алашара ахархәара 30% илаҟәит ҳәа азгәеиҭеит иара.
Ԥхынгәы 1, 2022 шықәса инаркны афымцалашара ахә ҩынтәны ишьҭыҵит. Атариф ҿыц шьақәдырӷәӷәеит атәыла аиҳабыра. Ахатәхаҿқәа рзы атариф 90 копеи ыҟоуп кВт/с азы, асоциалтә норма ала - 70 копеи. Аиурист хаҿқәеи анаплакҩцәеи рзы иазгәаҭоуп мааҭки 40 копеи кВт/с азы.