АҞӘА, ԥхынҷкәын 28 – Sputnik. Аԥсны иҟоу аурысцәа руаԥшьи акультуреи аспорти рзы москватәи агәыҳалалратә фонд "ЮнОлимпи" Агәабзиарахьчара аминистрра ацхраараз миллион мааҭ анаҭеит ҳәа аанацҳауеит аусбарҭа апресс-маҵзура.
Агәыҳалалратә ҳамҭатә ԥарақәа рыла Ареспубликатә хәыҷтәы хәшәтәырҭаҿы амаҭәахәқәа аахәахоит.
"Амедицинатә хархәагақәа раагаразы аилаӡара анапы аҵаҩуп. Аԥсны иҟоу аурысцәа руаԥшьи акультуреи аспорти рзы москватәи агәыҳалалратә фонд "ЮнОлимпи" ҭабуп ҳәа расҳәоит. Иааунырыртә иҟоу ацхыраара ҳарҭеит", - ҳәа иҳәеит аминистр Едуард Быҭәба.
Арҭ аԥарақәа рыла иаахәахоит авидеопроцессор, авидеогастроскопқәа, авидеобронхоскоп, амониторқәа уҳәа егьырҭ зыда ԥсыхәа ыҟам ахархәагақәа.