АҞӘА, ԥхынҷкәын 28 - Sputnik. Урыстәыла ахада Владимир Путин ЕААи аҽа ҳәынҭқаррақәаки анефҭ аҩаӡаратә хәԥсақәа рганахь ала иҟарҵаз алагаларақәа рҭак уснагӡатәқәа рзы аусԥҟа инапы аҵеиҩит. Аусԥҟа атекст кьыԥхьуп азинтә информациа апортал аҿы.
Адокумент инақәыршәаны анефҭ аҩаӡаратә хәԥсақәа ралагалара аҭакс Урыстәыла ари аҭагылазаашьа дҵаны иқәзыргыло атәылақәа рахь анефҭи анефҭаалыҵқәеи рынашьҭра мап ацәнакуеит.
Ззин ҟаҵам анашьҭрақәа рымҩаԥгара алшоит ахада изин ҷыда аиура ашьҭахь.
2023 шықәса жәабран 1 инаркны урыстәылатәи аԥкратә уснагӡатәқәа амчра роуеит, ԥхынгәы 1 аҟынӡа.
Ԥхынҷкәын 5 инаркны урыстәылатәи анефҭ аганахь ала Мраҭашәара атәылақәа рсанкциақәа амчра роуит: Евроеидгыла мшынла имҩанырго анефҭ адкылара мап ацәнакит, "Абыжьба Ду" атәылақәеи, Австралиеи Евроеидгылеи анефҭ мшынла амҩанграан ахәқәа баррельк азы 60 доллар ҳәа ишьақәдыргылеит.
Ари аҭакс Москва аҳәамҭа ҟанаҵеит ишазхиоу анефҭыҵхра аиҵатәра.