АҞӘА, ажьырныҳәа 5 - Sputnik, Бадраҟ Аҩӡба. Аԥсны абылтәыҭаҭәарҭақәа рҟны абылтәы ахә каҳаит Урыстәыла аахәаратә хәыԥса ахьылаҟәыз иабзоураны.
Абылтәыҭаҭәарҭақәа рҟны АИ–92 литрк азы 47 мааҭ аҟынтәи 45 мааҭ рҟынӡа илаҟәит, АИ-95 акәзар 59-60 мааҭ рҟынтәи 55 маҭ рҟынӡа.
Убри аан адизельтә былтәы ахә шыҟац иаанхеит, литрк азы-64,5 мааҭ, иара убас АИ-100 - 68 мааҭ иаԥсоуп.
"Аҵыхәтәантәи амзақәа рзы абылтәы зауадқәа рҟынтә аахәаратә хәыԥса алаҟәра иаҿуп. Уи инамаданы аилахәыра "Аԥсны Оил" аџьармыкьа алахәыла аҳасабала, абылтәыҭирҭақәа рҟны ахәқәа ланарҟәит. Ари аҩыза арбагақәа ҟалалоит, уи атәы уажәаԥхьагьы иаҳҳәахьан", - ҳәа иҳәеит Sputnik аинтервиу азҭаз аилахәыра адиректор хада Олег Лакоба.
Иара иажәақәа рыла, ахәԥсақәа рыларҟәра иунарбоит абылтәы еилахәырақәа еицәажәаны ахәқәа шышьҭырымхыз.
Лакоба иазгәеиҭеит, аҵыхәтәантәи аамҭазы АИ-92, АИ-95 литрк азы ахә хәмааҭк ишеиҵахаз.