АҞӘА, ажьырныҳәа 6 - Sputnik. Аԥсны аҵыхәтәантәи имҩахь днаскьаргеит Донбасс иҭахаз ахатәгәаԥхарауаҩ Дмитри Ҵәыџьба ҳәа аанацҳауеит "Аԥсныпресс" амаҵзура.
"Ҳара иахьа наӡаза абзиараз ҳәа иаҳҳәоит аиашара зхы ақәызҵаз, зыжәлар рԥара иаԥсахаз Дмитри Ҭемыр-иԥа Ҵәыџьба. Иара хатәгәаԥхарала Аԥснынтәи Донбасс еибашьуа аинтернационалтә бригада "Пятнашка" далан, дҭахеит Донецк амҵан аибашьратә дҵа анагӡараан", - ҳәа иҳәеит атәылахьчара аминистр ихаҭыԥуаҩ Давид Бжьаниа аибашьҩы аҵыхәтәантәи имҩахь инаскьагара иазкыз аусмҩаԥгатә аҟны.
Дмитри Ҵәыџьба дҭахеит ԥхынҷкәын 27-28 руыха, иара ицҭахеит Аԥснынтәи хатәгәаԥхарала еибашьуаз даҿа ҩыџьа - Нодар Абыџбеи Адам Лагәлааи. Аҳәынҭқарра ахада инапынҵала аибашьҩы иԥсыбаҩ Аԥсныҟа иааган ажьырныҳәа 3 рзы.