АҞӘА, ажьырныҳәа 21 - Sputnik. Аԥсны Аҭагылазаашьа ҷыдақәа рзы аминистрра 2022 шықәсазтәи русура аихшьалақәа ҟарҵеит ҳәа аанацҳауеит аусбарҭа апресс-маҵзура.
Ажьырныҳәамза инаркны дара 1837-нтә цхыраара ицеит. Урҭ рахьтә 979 абылрақәа ирыдҳәалан, урҭ рҟны иҭахеит фҩык, еиқәырхан жәҩык.
Иара убас 167-нтә АҶА ирыԥхьеит амҩатә машәырқәа рахь. Урҭ раан иҭахеит фҩык, еиқәырхан 28. Аӡаҿы амашәырқәа ҟалеит 23-ҩык, ааҩык еиқәырхан, 13-ҩык ӡааҟәрылеит.
Шықәсык иалагӡаны 50-нтә аусбарҭа аусзуҩцәа ашьхарахь ицеит иҟьалаз аҭыԥантәи ауааи асасцәеи рыԥшааразы. 32-ҩык рыԥшааит, ааҩык рыԥсыбаҩқәа ԥшааны рыуацәа ирырҭеит.
Иара убас аиқәырхаҩцәа амедицинатә цхыраара рырҭеит 63-ҩык, ирԥшааит иԥжәо амаҭәарқәа 60, 20-нтә ишәарҭоу ахимиатә маҭәашьарқәа ԥырхагадартәит.
Аусбарҭа ахада Лев Кәыҵниа иара убас хазы иазгәеиҭеит АҶА инанагӡаз жәларбжьаратәи агуманитартә аоперациақәа. Урыстәыла Украина аоперациа ҷыда иалагеижьҭеи Аԥсныҟа иааган 132-ҩык ахҵәацәа, ЛЖәР, ДЖәР, Херсонтәи, ЗАпорожтәи аобластқәа рынхацәа агуманитартә цхыраара рзырышьҭуан. Шықәсык иалагӡаны уахь инашьҭын 200 тонна аидара.
Уи адагьы, Аԥсны АҶА аусзуҩцәа 15-ҩык ҩымчыбжьа Луганск иҟан, уа аиқәырхаратә усурақәа рымҩаԥгараҟны ицхыраауан. Аибашьра ахьцо аҭыԥқәа ирылыргеит Донбасс ахақәиҭтәразы иҭахаз ҳџьынџьуаа быжьҩык рыԥсыбаҩқәа.