Sputnik
Ҳазҭало амчыбжь ҿыц акультуратә хҭысқәа рыла рацәак ибеиамзаргьы, иҟоуп уахьнеиша, иубаша.
Ажьырныҳәа 27, 28 рзы РУСДРАМ асааҭ 19:00 рзы аҳҭнықалақь ауааԥсыреи асасцәеи иахәаԥшыр рылшоит аспектакль "Абырг Хабыгә игәыжь ажәабжь". Искандер иҩымҭа амотивқәа рыла ари аспектакль ықәиргылеит Антон Корнилов.
Арольқәа нарыгӡоит Џьамбул Жорданиа, Кирилл Шишкин, Осман Абыхәба, Руслан Жьиба, Аманда Кәарацхьелиаԥҳа, Марина Сыҷынааԥҳа, Ирина Делԥҳа.
Ажьырныҳәа 25 асааҭ 12:00 рзы Ацәыргақәҵатә зал аҿы иаартхоит аԥсуа сахьаҭыхыҩ Геннади Барцыц ирҿиамҭа иазку аекспозициа.
Геннади Барцыц – Аԥсны зҽаԥсазтәыз асахьаҭыхыҩ, СССР жәлар рсахьаҭыхыҩ А.М. Шилов иҵаҩы. 1989 шықәсазы Аҟәа имҩаԥган раԥхьатәи ицәыргақәҵа.
Барцыц иара убасгьы дрылахәын Москва, Санкт-Петербург, Прага, Ниу-Иорк, Париж, Вильниус, Минск, Бақәа уҳәа рҟны ацәыргақәҵақәа. Иусумҭақәа ахатәы коллекциақәа ирылахәуп.