Sputnik
Ҳазҭало амчыбжь ҿыц РУСДРАМ аспектакльқәеи Ацәыргақәҵатә зал хадаҿы имҩаԥысуа ацәыргақәҵеи рыла ибеиоуп.
Ажьырныҳәа 25 инаркны жәабран 3 рҟынӡа Ацәыргақәҵатә зал хадаҿы Аԥсны зҽаԥсазтәыз асахьаҭыхыҩ Геннади Барцыц хаҭалатәи ицәыргақәҵа мҩаԥысуеит. Ацәыргақәҵахь инагоуп еиуеиԥшым аамҭақәа рызтәи 60 усумҭақәа. Геннади Барцыц иусумҭақәа Аԥсны амилаҭтә галиреиеи, Урыстәыла, Чехиа, Польша, ЕАА рмузеиқәеи ахатә галереиақәеи аколлекциақәеи рҿы иҟоуп.
Ажьырныҳәа 30-31 рзы аурыс театр аҟны идырбахоит "В лучах". Қәгыларак змоу амоноспектакль далахәуп актриса Ирина Делба. Арежиссиор-ақәыргылаҩ Антон Корнилов.
Жәабран 2 асааҭ 19:00 рзы- акомедиа "Примадонны". Уи аҟны иаарԥшуп рбаҩхатәра рхы иархәаны атәым мазара зтәызтәырц зҭаху ҩыџьа аусурҭа змам актиорцәа рҭоурых.
Жәабран 4 асааҭ 19:00 рзы идырбахоит Фазиль Искандер ироман ала иқәыргылоу аспектакль "Софичка", арежиссиор Елена Одинцова. "Софичка" хәышықәса раԥхьагьы студенттә спектакльны иддырбахьан. Аха иахьа ақәыргыламҭа даҽа бжьык, даҽа цәак ахоуп.
Жәабран 5 асааҭ 15:00 рзы идырбахоит ахәыҷтәы спектакль "Братец Кролик и Братец Лис". Раԥхьаӡа ари аспектакль дырбан 2017 шықәсазы. Аспектакль арежиссиор Анастас Кичик.