АҞӘА, жәабран 9 - Sputnik. Аԥсны ахада Аслан Бжьаниа Шьамтәыла зқьыла аԥсыҭбарақәа зыхҟьаз адгьылҵысра атәы дазҵааит иколлега Башар Асад даниацәажәоз, абри атәы аанацҳауеит атәыла ахада ипресс-маҵзура.
Аслан Бжьаниа Башар Асад дидышшылеит иҟалаз арыцҳара инамаданы, иара убас илшо ала ацхыраара аҟаҵара дшазыхиоу иҳәеит.
Ҷыдала иуҳәозар, дара еицәажәеит адгьылҵысра зҭаацәа алаӡыз ахәыҷы иаҭымцәа аԥснытәи асанториқәа рҿы ареабилитациа иахысырц.
Иара убас аԥсабаратә рыцҳара ахҟьаԥҟьақәа раԥырҟәҟәааразы аԥыза-министр Александр Анқәаб инапы ианҵан Шьамтәылеи Ҭырқәтәылеи арыцҳара иақәшәаз ауаа агуманитартә цхыраара рыҭаразы аусмҩаԥгатәқәа еиҿикаарц.
Жәабран 6 рзы зымч ӷәӷәаз адгьылҵысра ҟалеит. Аҵыхәтәантәи адыррақәа рыла Ҭырқәтәыла иҭахеит 16 546-ҩык, ахәрақәа зауз - 66 нызқьҩык. Шьамтәыла иҭахеит х-нызқьҩык, ахәрақәа зауз рхыԥхьаӡара атәы рҳәаӡом.