АҞӘА, жәабран 11 – Sputnik. Шьамтәылеи Ҭырқәтәылеи ааха зауз рыцхрааразы агәыҳалалратә концерт мҩаԥысит Аԥснытәи аҳәынҭқарратә филармониаҟны асабшаҽны, жәабран 11 рзы.
Аԥснытәи аҳәынҭқарратә филармониаҟны иқәгылеит аҳәынҭқарратә хортә капелла, Давид Терзиан напхгаҩыс дызмоу Аԥсны акамертә оркестр, иара убас Нинель Бжьаниа, Гулиза Аҩӡба, Нана Черкьезиа, Елена Ҳагба, аскрипкарҳәаҩы Мариа Терзиан-Ҳагба.
Аԥсны акультура аминистрра аусзуҩ Сариа Маршьанԥҳа лажәақәа рыла, агәыҳалалратә концерт еиҿнакааит Акультура аминистрра, артистцәа ари аҩыза ажәалагала иадгылеит.
Зымчхара 7,7 иҟаз адгьылҵысра ҟалеит Ҭырқәтәыла алада-мрагыларатәи ахәҭаҿы ашәахьа ашарԥазы. Иара уи аҽныҵәҟьа уа 7,6 иҟаз амч змаз даҽа дгьылҵысрак ҟалеит. Адгьылҵысрақәа, уи ашьҭахь аҭыԥ змаз афтершокқәа рнырит атәыла апровинциақәа жәаба, иара убас агәыларатә тәылақәа, Шьамтәыла налаҵаны.
Аҵыхәтәантәи адыррақәа рыла, 22 327-ҩык ҭахеит, 80 278-ҩык ахәрақәа роуит.
Адгьылҵысра иахҟьаны Шьамтәылеи Ҭырқәтәылеи руааԥсыра ацхыраара ахьырзеизыргаша аҭыԥ аадыртит Аҟәа, Аԥсны АҶА аофис хадаҿы, (Аконфедератцәа рымҩа, 12). Дамаск иҟоу аԥсуа цҳаражәҳәарҭа цхыраагӡак аҳасаб ала 10 миллионк шьамтәылатәи алир (100 000 мааҭ инареиҳаны) аларгалеит.