Сариа Кәарацхьиаԥҳа, Sputnik
Жәабран 13- 19 рзы акультуратә ԥсшьара бзиа избо ирзыԥшуп атеатртә мчыбжьы.
Акультуратә мчыбжьы аанартуеит Аҿар ртеатр аспектакль “Амшә” ала, жәабран 13 асааҭ 18:30 рзы. Ақәыргыламҭа абзиабара, ақәыԥшра, аԥсҭазаара азгәашьра ирызкуп.
Жәабран 15 - 16 асааҭ 19:00 рзы Аԥсуа драматә театр аҿы иқәдыргыло Достоевски ироман "Бедные люди" ала Владимир Симановски ипиеса иалху аспектакль ҿыц абзиабареи, аԥареи, амчреи ирызкуп. Арежиссиор-ақәыргылаҩ – Урыстәыла зҽаԥсазтәыз артист Адгәыр Ақаҩба.
РУСДРАМ аҿы иааиуа амчыбжь азы еиуеиԥшым аспектакльқәа.
Жәабран 14 асааҭ 19:00 рзы –“Солиарис”. Арежиссиор – Женовач иҵаҩы, Искандер ихьӡ зху арежиссиортә лабораториа алахәыла Артем Устинов . Аинтеллектуалтә спектакль ухы-угәы уҭанархәыцуеит, ииасхьоу аамҭахь уархынҳәуеит.
Жәабран 16 асааҭ 19:00 рзы – “Зегь рцасҳәа агәырӷьара” - арежиссиор Мариа Романова. Аспектакль аԥсҭазаара агәазыҳәара иазышәаҳәоит, испаниатәи ашәҟәыҩҩы, адраматург Федерико Гарсиа Лорка ипоезиа ссир иахылҿиааит.
Жәабран 18 асааҭ 19:00 рзы “Ишьаарҵәыроу ачара” - арежиссиор Мариа Романова. Испаниатәа адраматург Федерико Гарсиа Лорка испектакль азкуп ззин ыҟам абзиабара, ашьоура.
Жәабран 19 асааҭ 15:00 рзы - ахәыҷтәы спектакль "Алакәтәыла Оз аҟынтә ахынҳәра". Арежиссиор-ақәыргылаҩ - Џьамбул Жорданиа. Жорданиа иҩымҭоуп аинсценировка, амузыка, ашәақәа.