АҞӘА, жәабран 13 - Sputnik. Урыстәыла агәы иҭоуп аԥхьаҟагьы Аԥсни Аахыҵ Уаԥстәылеи иареи реизыҟазаашьақәа рырҭбаара ҳәа лҳәеит Урыстәыла ААР ахаҭарнак ҷыда Мариа Захарова.
"15 шықәса раԥхьа Аԥсни Аахыҵ Уаԥстәылеи рхьыԥшымра азхаҵо Урыстәылатәи Афедерациа урҭ рыхьчара, ԥхьаҟа рыҿиара, ҳаамҭа иақәшәо ҳәынҭқарраны рышьақәгылара хәдықәҵара азнауит", - ҳәа азгәалҭеит Захарова.
Лара илҳәеит Москвеи, Аҟәеи, Цвихвали рыдәныҟаполитикатә позициақәеи рекономикатә позициақәеи шдырӷәӷәо. Урыстәыла иалшо ацхыраара ҟанаҵоит еиуеиԥшым аусхкқәа рҿы– асоциал-економикатә ҿиараҿы, абитуриентцәа рзы аҵараиурҭақәа рҿы аҭыԥқәа ралхреи агрантқәа рыҭареи, акультуратә усеицураҟны уҳәа.
Захарова лажәақәа арыла арҭ зегьы Урыстәыла аинтересқәа ирықәшәоит, ашәарҭадаратә маҟа арҭбаараҿы, атуристтәи аусутәтәи лшарақәа рҿы, Аахыҵ Кавказ аршәҭыкакаҷраҿы.
Лара иара убасгьы илҳәоит, Москва аҵак ду шанаҭо аҩ-республикак ршәарҭадара, уи иахьатәи агеополитикатә ҭагылазаашьақәа рҿы аҵак ду шамоу. Аусурақәа цоит Қырҭтәыла амчра ахы ишанамырхәо азы аҭакԥхықәра иаҵагыларазы.