АҞӘА, жәабран 15 - Sputnik. Адунеизегьтәи аԥсуа-абаза конгресси (АААК) амузыкант Абзагә Марыхәбеи апроект ҿыц "Аҿар рыбжьы" хацдыркит ҳәа аанацҳауеит АААК асаит.
"Аҟыбаҩ ҷыда злоу ауаа ирыцхраалатәуп. Ҩыџьа-хҩык ракәзаргьы, ԥхьаҟатәи аԥеиԥш ззаҳартуа, уигьы акраҵанакуеит", - иҳәоит апроект аидеиа автор Абзагә Марыхәба.
Апроект аҳәаақәа ирҭагӡаны аԥхьатәи аҟазаратә-класс мҩаԥысит жәабран 9 рзы Гәдоуҭа. Иара далахәын ателееицлабра "Ты супер!" аҿы аиааира згаз Валериа Адлеиаԥҳа. Лара далацәажәеит амузыка адунеи ахь раԥхьатәи лшьаҿақәа шымҩаԥысуаз.
"Арҿиара знапы алаку ауаҩы изы, аиҳаракгьы аҿар рзы, адгылара аиура акраҵанакуеит. Уи азы сара схаҭа сҿырԥшыгоуп. Сани авокал азы сырҵаҩи ракәымзар, авокалгьы амузыкагьы снапы рыласымкыр ҟаларын", - лҳәеит лара.
Асеиԥш аҟазаратә-классқәа мҩаԥгахоит Тҟәарчал, Гал, Очамчыра. Уи иалҵшәахоит ашәа ҿыцқәа, амузыкатә клипқәа, ахьӡ ҿыцқәа.