АҞӘА, жәабран 21 – Sputnik. Белоруссиа ахада Александр Лукашенко Минск еснагь Аԥсны аус ацура аинтерес аман иҳәеит, Аԥсны анапхгареи иареи реиԥылара Қырҭтәыла агәынамӡара ахьанаҭо шизеилымкаауагьы азгәеиҭеит.
"Исзеилкаауам, избан Аԥсны анапхгареи сареи ҳаиԥылара Қырҭтәыла агәынамӡара зазцәырнаго. Ауааи ажәларқәеи рыбжьара аизыҟазаашьа ԥхақәа ҟалар алымшаӡои? Иҟалар амуеи аԥсуеи ақырҭуеи жәларқәа рыбжьара аизыҟазаашьақәа аҭынчреи аиҩызареи рахь икылыргар? Шәареи ҳареи Қарҭ аганахьала акциак амҩаԥгара ҳаламцәажәацт", - иҳәеит Белоруссиа ахада Минск Аслан Бжьаниа дидкыло ҳәа Лукашенко иажәақәа аанагоит амаҵзура Белта.
Белоруссиа ахада Александр Лукашенко иҳәеит 2022 шықәсазы иара Аԥсны иҟазаараангьы ари шазгәаҭаз Аԥсны аус ацура аинтерес шрымоу.