АҞӘА, жәабран 22 – Sputnik. Урыстәыла адәныҟатәи аусқәа рминистр ихаҭыԥуаҩ Михаил Галузини Аахыҵ Кавказ азы Евроеидгыла ахьӡала аиҿцәажәарақәа рыцхантәаҩ Тоиво Клаари изаамҭанытәиу араунд азҵаарақәа ирылацәажәеит ҳәа аанацҳауеит Урыстәыла ААР.
"Урыстәылатәи аган аҽазныкгьы азхьаԥшра анаҭоит изаамҭанытәиз Жәларбжьаратәи аиҿцәажәарақәа изныкымкәа рымҩаԥгара аҿҳәареиҭакра шылҵшәадоу. Ари аҩыза апрактика акрызҵазкуаны зхы аазырԥшхьоу аиҿцәажәаратә механизм аусура зынӡа иааннакылар алшоит. Уи арегионалтә шәарҭадара ҵнашәаауеит", - ҳәа ҳәоит аусбарҭа адырраҿы.
Галузин ҭелла аицәажәараан ишьақәирӷәӷәеит Урыстәыла аиҿцәажәарақәа, Аԥсни Аахыҵ Уаԥстәылеи ршәарҭадара аиҿкаара азҵаарақәа рылацәажәара ишрыдгылаҩу.
Галузини Клаари иара убасгьы ирзааҭгылеит Ермантәылеи Азербаиџьани рыбжьара аизыҟазаашьақәа рҭышәныртәалара.
Адәныҟаполитикатә усбарҭа адырра ҟанаҵоит, жәабран 21-22 рзы имҩаԥысраны иҟаз Женеватәи аиҿцәажәарақәа рраунд ахьахырԥахаз азоуп ас еиԥш аӡбарҭа зрыдыркылаз ҳәа. Аӡбара рыдыркылеит Евроеидгыла, ЕАР, ОБСЕ рҟынтәи ацхантәаҩцәа рхаԥышәала.
Аԥсны адәныҟатәи аусқәа рминистр Инал Арӡынба ацхантәаҩцәа рхымҩаԥгашьа аиҿцәажәаратә процесс иаԥырхагоуп, арегион аҿы аҭышәынтәалара ашәарҭара иҭанаргылоит ҳәа ишьоит.
Женеватәи аиҿцәажәарақәа рыцхантәаҩцәа рделегациа жәабран 8-9 рзы Аԥсны аофициалтә хаҿқәа ирԥылараны иҟан, аха Аԥсны адәныҟатәи аусқәа рминистрра Женеватәи аиҿцәажәарақәа рыцхантәаҩцәа рделегациа ҭакк аҳасабала атәыла алалара азин рырымҭеит.