АҞӘА, жәабран 22 - Sputnik. Аԥсны аҩнуҵҟатәи аусқәа рминистр Вальтер Быҭәба Гәдоуҭа араион аҿы анҭыҵтә еилацәажәара мҩаԥигеит ҳәа аанацҳауеит ареспублика аусбарҭа апресс-маҵзура.
Гәдоуҭа араион аҩнуҵҟатәи аусқәа рыҟәша аиҳабы Зосма Гыцба ииасыз ашықәс азтәи аусура аихшьаалақәа ҟаиҵеит.
2022 шықәсазы араион аҿы ашәҟәы иҭагалоуп 111 цәгьоура, 97 аарԥшуп. 2021 шықәсазы – 85 цәгьоура рҟынтәи иаарԥшын 72.
2022 шықәсазы уаҩшьраки ԥҳәыск лцәаԥҽреи ҟалеит, имҩаԥысит 19 ӷьычра, х-рҳәрак. Зыԥшаара иашьҭаз 38-ҩык рахьтә иаанкылан хәҩык, быжьҩык хабарда иӡит ҳәа ишьан.
Ашықәс аҩнуҵҟа закәаншьаҭада абџьар амазаараз 22 факт азгәаҭан, закәаншьаҭада анаркотикқәа реикәыршараз 43 факт азгәаҭан.
Ашықәс аҩнуҵҟа араион амҩақәа рҿы 48 автомашьынатә машәыр ҟалеит. Иҭахеит 14-ҩык. 2021 шықәсазы – 47 машәыр, иҭахеит 14-ҩык. Амҩатә ԥҟарақәа рзы 6 152 ԥкаанҵа шьақәыргылан, урҭ рҟынтәи 505 арыжәтә ажәра иахырҟьаны. 340 зинеилагаҩ рдокументқәа рымхын. Азеиԥш хараԥса иартәеит 7,9 миллион мааҭ.
Иааидкыланы аминистр араионтә ҟәша аусура цәгьам ҳәа ахиҳәааит, анапынҵа ҟаиҵеит ашьҭазаара змоу рыԥшаарази акрипторҳагатә хархәагақәа рыԥшаарази аусурақәа дырӷәӷәарц.