АҞӘА, жәабран 24 – Sputnik. Приднестровие аҭагылазаашьа ҭышәынтәалоуп, иҭынчроуп, аҳәынҭусбарҭақәа зегьы аус шыруц ируоит, абри атәы Аԥсны ААР аминистр ихаҭыԥуаҩ Иракли Ҭыжәба изеиҭеиҳәеит Приднестровие Молдавиатәи Ареспубликаҿ иҟоу Аԥсны ахаҭарнак Александр Ватаман.
"Приднестровиатәи аган аиҿцәажәарақәа рыла иҟоу аҭагылаазашьа арҽеира ауп мҩас иалнахо", - иҳәеит Ватаман.
Киевтәи амчрақәа Приднестровие алалара рҽазыҟарҵоит, уи уа игыло урыстәылатәи аҭынчреиҿкааҩцәа ашәарҭара иҭанаргылоит, абри азы аҳәамҭа ҟанаҵеит Урыстәыла Атәылахьчара аминистрра.
Аусбарҭаҿы иазгәарҭеит украина-приднестровиатәи аҳәааҿы аибашьыга техника, артиллериа, аруаа гылоу ҳәа. Иара убагьы УАМ аԥырҩы дызҭам ахархәагақәа хыԥхьаӡара рацәала рыԥырра убарҭоуп.
Приднестровие инхо рҟынтә 60 процент аурысқәеи украинааи СССР еилаҳаанӡагьы Молдавиа алҵра рҭахын, ареспублика Румыниа иадлар ҳәа ишәаны.